Është kjo Erisa Ahmetaj këngëtarja nga Kruja që kultivon këngën e pastër shqipe. Megjithëse këtë profesion ajo e kishte nisur para shumë vitesh, mirëpo angazhimet në mësime nuk ia kishin mundësuar të jetë shumë aktive në skenë. Tani meqë është në përfundim të studimeve Erisa i është rikthyer skenës për të mos braktisur kurrë.

Tani këngëtarja është duke përgatitur një këngë të re, e cila do të plasohet bashkë me videoklip. “Këngën e kam dashur gjithnjë, në realitet jam rritur me këngën, mirëpo nuk kam mundur të jem shumë aktive në skenë për shkak të obligimeve në studime. Tani jam pak më e lirë dhe i jam rikthyer skenës. Së shpejti adhuruesit e mi do të kenë një singël nga unë, që besoj se do të jetë një befasi për ta”, ka thënë ajo.

Karakteristikë e Erisës është interpretimi live, ajo nuk pëlqen këndimin ‘playback’ dhe këngët që do t’i kultivoj në të ardhmen thotë se do të jenë të gjitha live. Pas përfundimit të sezonit të verës, Erisa do të sjellë një album live. “Jam e frymëzuar për muzikën e mirëfilltë popullore, kështu që edhe në album do të sjellë këngë të vjetra të cilat kanë filluar të mos kultivohen kohën e fundit nga artistët dhe shpresoj që do të jetë diçka e bukur për publikun”, shton ajo. Erisa përveç këngës në të ardhmen pretendon të bëhet edhe një politikane, pasi që studion në këtë drejtim.

---