Shkollimin e nisi në Stagovë, një fshat kaçanikas. Në vitin 2001 familja e tij u shpërngul në Ferizaj, ku mbaroi me sukses të shkëlqyer filloren në shkollën "Ahmet Hoxha". Shkollimin e mesëm e mbaroi në Medresenë e Mesme "Alauddin" në Prishtinë. Ka mbaruar studimet në Universitetin e Prishtinës, në Fakultetin e Filologjisë, dega Letërsi Shqipe, dhe menjëherë ka vazhduar edhe studimet master, të cilat i përfundoi në afat të rregullt.

Me krijimtari letrare nisi të merret që në fëmijëri. Ka të botuara disa vepra letrare dhe joletrare: dy me poezi; një në prozë; në udhëpërshkrim; tri vepra studimore, si dhe poezi e tregime në për revista e antologji të ndryshme. Në vitin 2014 ka botuar studimin "Struktura e ironisë". "Struktura e ironisë" ("Një figurë në tre modele") është titull i kërkimit studimor që ka si objekt ironinë dhe manifestimin e saj si figurë dhe si strukturë, duke e nënkuptuar edhe si strategji kreative. Pra, nëntitulli i librit, "Një figurë në tre modele", është precizim i objektit të studimit, respektivisht shkrimtarët Franc Kafka, Rexhep Qosja dhe Ismail Kadare. Në vitin 2023 ka botuar udhëpërshkrimin letrar "Hera e parë në Mekë". Ndërsa, në vitin 2024 ka botuar studimin monografik "Distopia e Kadaresë".