Ai mbante edhe detyrën e përgjegjësit të Artit në Qendrën Kulturore të Fëmijëve në Malësinë e Madhe. Ai është vlerësuar si një nga këngëtarët më të spikatur jo vetëm në Malësi të Madhe, por edhe në të gjitha trevat e tjera shqiptare dhe në diasporë.

Është ndarë nga jeta në moshën 48 vjeçare këngëtari i muzikës popullore të Malësisë së Madhe, Arben Delaj. Shkak për ndarjen e parakohshme nga jeta të këngëtarit 48 vjeçar është bërë një infarkt. Këngëtari sapo kishte dalë nga shtëpia kur është ndjerë keq dhe ndonëse i është dhënë ndihma e menjëhershme, ka qenë e pamundur të parandalohet më e keqja. Këngëtari Arben Delaj la pas 3 fëmijët e tij, bashkëshorten, të afërmit, por edhe admiruesit e shumtë të këngës së tij.