Kjo nuk është një festë e vërtetë, por na është kërkuar para EURO 2016, nga artdashës dhe sportdashës të krijonim një faqe dedikuar kombëtares kuq e zi të futbollit, ku të përmblidheshin këngë, videoklipe, poezi dhe foto.

Kombëtarja Kuq e Zi është ekipi kombëtar i futbollit të Shqipërisë dhe kontrollohet nga Federata Shqiptare e Futbollit, ajo është krijuar që nga viti 1932. Edhe pse asnjëherë nuk ka luajtur asnjë ndeshje, ekipi shqiptar i futbollit kombëtar ka ekzistuar para se të krijohej FSHF. Kjo gjë dëshmohet nga regjistrimi i kombëtares në Kupën Ballkanike të 1929–31 (edhe pse Shqipëria u tërhoq nga kompeticioni përpara se të fillonte). FSHF-ja u krijua më 30 qershor 1930 dhe Shqipëria priti 16 vite për të luajtur ndeshjen e parë ndërkombëtare, duke debutuar kundër Jugosllavisë në 1946. Në 1932, Shqipëria u bashkua me FIFA-n (gjatë kongresit në 12 qershor — 16 qershor) dhe në 1954, ajo ishte një nga anëtarët krijues të UEFA-s.

Ndeshja Serbi-Shqipëri ishte një ndeshje e vlefshme për Eliminatoret e Kampionatit Evropian të Futbollit 2016, e cila u zhvillua më 14 tetor 2014 në stadiumin e Partizanit në Beograd. Ndeshja u ndërpre pas hedhjes së flakadanëve dhe objekteve të tjera në fushë nga ana e tifozëve serbë. Në atë moment, në stadium futet një dron që mbante një flamur me simbole patriotike shqiptare. (Dy fotografi të Ismai Qemalit dhe Isa Boletinit, harta e Shqipërisë etnike me në qendër shqiponjën e Skënderbeut dhe mbishkrimi “Autochthonous”.) Gjatë ndërprerjes së lojës, mbrojtësi serb Stefan Mitrović hidhet për të marrë flamurin. Menjëherë lojtarët shqiptarë shkojnë drejt tij për t'ia marrë atë dhe Bekim Balaj arrin ta rrëmbejë flamurin, duke e dërguar atë te gjyqtari i katërt. Kjo shkaktoi hyrjen e tifozëve serbë në fushë, të cilët filluan të godisnin futbollistët shqiptarë, të ndihmuar edhe nga kujdestarët e stadiumit. Më 24 tetor 2014, UEFA vendosi që ndeshja të fitohej nga Serbia me rezultatin 3-0.

Data 11 qershor 2006 është data kur Kombëtarja e Shqipërisë debutoi në një kompeticion të rëndësishëm të UEFA-s, siç është Kampionati Europian i Futbollit (Euro 2016) në Francë. Më 11 qershor 2016, kuqezinjtë u përballën me Zvicrën, në ndeshjen e parë në Euro 2016 në stadiumin e Lensit “Stade Bollaert-Delelis”. Të pranishëm në atë sfidë ishin 33 mijë e 805 spektatorë. E veçanta e ndeshjes ishte përballja e dy vëllezërve Xhaka. Taulanti përfaqësonte Shqipërinë, ndërsa Graniti Zvicrën. Shqipëria ishte pjesë e Grupit A, në Euro 2016, së bashku me Francën, Zvicrën dhe Rumaninë. Kuqezinjtë e mbyllën fazën e grupeve në vendin e tretë me tri pikë, ndërsa Franca doli e para me shtatë pikë, Zvicra e dyta me pesë pikë dhe Rumania e fundit me një pikë. Një gol shënoi Shqipëria në atë kampionat dhe pësoi tre. Armando Sadiku ishte lojtari që shënoi golin e vetëm të Shqipërisë. Gol i shënuar në atë fitore 1-0 përballë Rumanisë, në minutën e 43-të.